ត្បូងឃ្មុំ៖ ស្តេចត្រីរាជញី ទម្ងន់ ១៦៣ គីឡូក្រាម ប្រវែង ២,២៥ម៉ែត្រ ឈ្មោះ «នារីរ័ត្នត្បូងឃ្មុំ» ដែលត្រូវចាប់បាននៅគល់ស្ពានគីហ្សូណា ខេត្តត្បូងឃ្មុំ» ត្រូវបានលែងចូលក្នុងទឹកទន្លេវិញ នាព្រឹកថ្ងៃទី១៦ ខែធ្នូ ឆ្នាំ២០២៣នេះ។

ត្រីរាជញីមួយក្បាលដ៏ធំនេះ ត្រូវបានអ្នកនេសាទ ឈ្មោះ ស៊េន យ៉ាក់កូប រស់នៅភូមិព្រែកតូច ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ ចាប់បានកាលពីថ្ងៃទី១៥ ខែធ្នូ ឆ្នាំ២០២៣។

មុនលែងចូលក្នុងទឹកទន្លេ ត្រីរាជញីនេះ ត្រូវបានក្រុមការងារបំពាក់ស្លាកដើម្បីតាមដានចរាចរផ្លាស់ទីរបស់ត្រី និងបានដាក់ឈ្មោះថា «នារីរ័ត្នត្បូងឃ្មុំ»។

រដ្ឋបាលជលផលត្បូងឃ្មុំ អរគុណយ៉ាងជ្រាលជ្រៅ ជូនចំពោះលោក ស៑េន យ៉ាក់កូប និងប្រជាពលរដ្ឋភូមិព្រែកតូច ដែលបានរាយការណ៍ជូនរដ្ឋបាលជលផល និងបានចូលរួមលែង អភិរក្សត្រីរាជកម្រនេះចូលទៅក្នុងទន្លេវិញ។

រដ្ឋបាលជលផលត្បូងឃ្មុំ ណែនាំពលរដ្ឋប្រសិនមានអ្នកចាប់បាន សូមរាយការណ៍មកកាន់រដ្ឋបាលជលផលតាមរយៈលេខ 012 805 347, 077 555 804, 097 909 0001៕